مەنبەسى: ئامېرىكا دۆلەت مىنىستىرلىكى تور بېكىتى؛
تەرجىمە قىلغۇچى: تاھىر ئىمىن ئۇيغۇرىئان
بىز تايلاندنىڭ كەم دېگەندە 40 ئۇيغۇرنى خىتايغا مەجبۇرىي قايتۇرۇشىنى ئەڭ كۈچلۈك شەكىلدە ئەيىبلەيمىز، ئۇلار خىتايدا قانۇنىي ھوقۇقلىرىدىن مەھرۇم بولىدۇ. ئۇيغۇرلار خىتايدا زىيانكەشلىككە، مەجبۇرىي ئەمگەك ۋە قىيىن-قىستاقلارغا دۇچ كەلمەكتە.
تايلاندنىڭ ئۇزۇن يىللىق ئىتتىپاقدىشى بولۇش سۈپىتىمىز بىلەن، بىز بۇ ھەرىكەتتىن جىددىيلەشتۇق، چۈنكى بۇ، تايلاندنىڭ «بىرلەشكەن دۆلەتلەر تەشكىلاتىنىڭ قىيناشلارغا قارشى كېلىشىمى» ۋە «بارلىق شەخسلەرنى مەجبۇرىي غايىب بولۇشتىن قوغداش توغرىسىدىكى خەلقئارالىق كېلىشىمى» بويىچە خەلقئارالىق مەجبۇرىيەتلىرىگە خىلاپلىق قىلىش خەۋپىنى تۇغدۇرىدۇ. بۇ ھەرىكەت تايلاند خەلقىنىڭ ئاجىز كىشىلەرنى قوغداشتىن ئىبارەت ئۇزاق تارىخى ئەنئەنىسىگە زىت كېلىدۇ ۋە تايلاندنىڭ ئىنسان ھوقۇقلىرىنى قوغداش ۋەدىسىگە ماس كەلمەيدۇ. بىز ئۇيغۇرلار قوغدىنىش ئىزدەۋاتقان دۆلەتلەردىكى بارلىق ھۆكۈمەتلەرنى ئېتنىك ئۇيغۇرلارنى خىتايغا مەجبۇرىي قايتۇرماسلىققا چاقىرىمىز.
خىتاي، خىتاي كوممۇنىستىك پارتىيەسىنىڭ يېتەكچىلىكى ۋە كونتروللۇقىدا، شىنجاڭدىكى ئاساسلىقى مۇسۇلمان ئۇيغۇرلار ۋە باشقا ئېتنىك ۋە دىنىي ئاز سانلىق گۇرۇپپىلارنى نىشان قىلغان قىرغىنچىلىق ۋە ئىنسانىيەتكە قارشى جىنايەتلەرنى سادىر قىلدى. بىز خىتاي ھۆكۈمىتىدىن قايتۇرۇلغان ئۇيغۇرلارنىڭ بىخەتەرلىكىنى دائىمى ھالەتتە تەكشۈرۈشكە تولۇق رۇخسەت بېرىشىنى تەلەپ قىلىمىز. تايلاند ھۆكۈمىتى چوقۇم خىتاي ھۆكۈمىتىنىڭ ئۇيغۇرلارنىڭ ئىنسان ھوقۇقلىرىنى قوغدىشىنى تەلەپ قىلىشى ۋە بۇنى ئىزچىل ھالدا تەكشۈرۈپ تولۇق جەزىملەشتۈرۈشتە چىڭ تۇرۇشى لازىم.
